Pu Chhurbura an tih chu

Mizo thawnthu khawvela a chanchin ngaihnawm tawp thei lo chu Chhurbura chanchin hi a ni a, miin Mizo thawnthu hi hre viau mahsela Chhurbura chanchin hi an hriat telloh chuan a kim thei ngai lo. Dik taka kan sawi duh chuan Mizo thawnthu khawvelah hian Chhura ang tluka lar leh chanchin ngah leh a chanchin ngaihnawm bawk si hi tumah an awm thei lovang tih a chiang a ni.

A chanchinah hian thil inkawkal tak tak leh mak danglam tak tak a awm a, naupang leh pitar leh putar chena ngaihnawm tih theih tur thil chi hrang hrang a in phan kual vel a ni. Kawng khata kan ngaihtuah chuan a atna lam hian rilru a kaihruai thui hle a, hmanlai thawnthua mi hming larte zingah pawh a mawl ber tluan chhuak a ni awm mang e tih tur khawp a ni.

Kawng lehlama kan thlir leh thung chuan a finna lai chharchhuah tur a tam hle thung. A thiltih zawng zawng leh a nungchangte hi ngunthluk zawka kan ngaihtuah chuan a buang angin lang thin tak mahse, a atna chhan hi kan hriat tam tak hi chu a u Nahaia a khawngaih leh hmangaihna vang liau liau a ni tih a hriat theih. Naa lah hi mi thatchhia leh zelthel thiam tak a lo ni ve nen. Chhura chanchina ngaihnawm tak takte hi Nahaia nen an thiltih dun leh an pahniha chunga thil thlengte a ni tlangpui.

Nahaia nena an chettlatna kawng hrang hrangah hian Chhura chuan thil hrehawm leh vanduaian eng engemaw a tawk chho deuh reng a. Chu chu Nahaian a bum fin vang a ni a. Naa tellohnaah erawh chuan Chhura hi a hlawhtling thei em em a ni.

A chanchin hi khawilai atang pawn sawi tan dawn ila ngaihnawm tak a ni thei zel a, chanchin tawi leh hlimawm tak tak sawi tur a nei thluah a ni. Chhura chanchin danglamna tak chu, thawnthu dang anglo takin a khawilai atang pawhin sawi tan ila a inlalawn chho thei zel a, a ngaihnawmna a nep chuang lo. Khawi atangin nge sawi tan leh tihtawp tha zawk ang aw tih hi mi tam tak rilru tibuaitu a ni mah mah zawk a ni.

Mi tam takin an sawi thin dan chuan khawvel hmun thenkhat zawl diai duai hote hi Chhura vuak zawl anga sawi a ni thin a. Tuboh lian tak a nei a, chu chuan lei sakhat leh lungte a vaw kehdarh vek a, zawlah a siam a, hmun thenkhat a lo vaw khuar nasa deuhva, luikawr leh phaikuamah a lo tang a, a vuak zawl that peih loh lai leh a kalsan laite chu tlang pawngah a lo chang ta nia ngai an awm a, chung a tih hnua a thih dan pawh hi mi tam takin an hrechiang thei lova, a thih dan chungchangah hian ngaihdan hrang pawh a tam thei hle.

A thihdan chungchang hi thenkhat sawi dan chuan, a zinna tumkhatah tawhsual a tawk nia ngai an awm a. Thenkhat sawi dan chuan a zinna Mawngping khuaah Lal ni zuiin nuamsa takin a thi niin an sawi bawk.

Chubakah chuan a thihdan chungchang hi sawi dan chi khat a la awm leh a. Vawikhat chu an khuaah mite chu hlim takin an infiam a. Chhura chuan nuam a ti em em mai a, tel reng mai chu a duh a, mite chuan an inlamah chawte an va ei a, an va inhraipuar leh te te thin a. Chhura erawh chuan haw nachang pawh a hre lo reng reng a. Chutai engmah ei leh in lova hun rei tak chu intihhlimnaa a tel avang chuan riltam leh taksa chauh luat tuar lovin a thi niin an sawi bawk.

A thihdan hi a enga pawh chu nise Chhura hi a thih lai vel chuan khawkhata mi langsar leh mite hriat lar tak niin a thi a ni tih chu a chiang hle.

He khawvel hi siam anih laia tel ve angin sawina awm thin mahse kum zabi 14-na lai vel bawr khan Mizoram chhaklam khawi hmun hmunah emaw hian a khawsa niin hrait a ni a, chung hmunah chuan a sulhnu thil chi hrang hrang - a fa rep te, a se khalh te, a talhtum tihte hmuh tur tam tak tun thleng hian a la awm.