Pasaltha Chawngbawla Chanchin
Chawngbawla hi mi huaisen leh mite chhuanvawr ni mahse chapo lo tak mai leh uangthuang lo tak a ni a. Tum khat pawh zu hmunah amah la hre ngai lotu mipakhat hian a cho sual pek a, “Nang thiana, sa bawp engzat nge i man ve tawh ?” a ti chhen mai a, Chawngbaawla chuan, “Sa bawp tih tham pawh ka la man ve lo,” a ti mai a, mahse chupa chuan a zawh tak sek sek avang chuan Chawngbawla chuan, “Chutia min zawh sek sek si chuan, man tihtham pawh ka la nei lo, a lungthu pawh a la kim lo. Savawm ramtla bawp pakhat ka man a, Sakei chho sang kai bawp pakhat ka man bawk a, chuti zawng chu a ni mai,” a ti ta a. Chupa zak lutuk chu a chhuak ta daih mai a ni an ti.
Chawngbawla hi mi hrang sa hrang laka a chanchin sawi tur a tam hle mai a, sahrang lakah pawh chanchin sawi tur nei teuh mahse a hming chherna ber hi chu ral laka a huaisenna hi a ni mah zawk a. An lal Seipuia pawhin a thlamuan pui ber pakhat a ni a, Sepuia khaw chhantu kulhpui pakhata ngaih a ni ve reng a ni. Chhim leh Hmar indo lai khan Chhim lam chuan Sialhmur an run a, Sialhmur hi Khawhai ram chhung, Tlangpuite kianga awm a ni a. Sialhmur run tuma lo chhantute chu Vanhnuailian leh a nau Thawmvunga leh a pu Vuttaia te ho an ni a, a runtute lam ve thung hi Lalpuithanga te unau Khawsaia, Thawngduta leh a thiante ho an ni thung a.
Sialhmur runnaah hian Lalpuithanga te chuan an pasaltha Chawngbawla hi an hruai a, Hmarlam pasaltha Nghatebaka kalbo hlan kherin Sialhmur chu an run a. Ani Nghatebak a lo haw chuan chutia a awmloh hlana an khua an lo run chu a thinrim nasa mai a, “Ka nghate bak hlan khera ka khua in lo run,” a ti a a umzui ta nghal a, a kap zui thuai thuai mai bawk a. Chhim lam ho chu tang ngam loin an tlanchhe ta a. An pasaltha Chawngbawla chuan hnu a dal zel a, midang ho chuan, “Khawnge maw Chawngbawla kha le?” an ti a Chawngbawla chuan, “Tlan rawh u, tlan rawh u, Chawngbawla pawh a bawl thei tawh lo a nih hi,” a ti a. Tichuan Chhim ho chu an tlan zel a, Nghatebaka pawh chuan a umzui zel a, nakin deuhah chuan Chawngbawla chuan, “Min han um tawh suh i thi palh ange,” a ti a mahse Nghatebaka chuan a um lui zel a, tichuan Chawngbawla chu kawngsirah a penga, a lo chang a, a lo kap thlu ta der mai a ni. Heta tang hian Chawngbawla hi a hmingthan phah zual hle a ni. Chawngbawla hian, “Huai zawng a tha love, kei aia huai chu lu zuar an ni; ka huai hi i a tawk lek a ni,” a ti thin a ni.
Sawi dan pakhatah chuan Sialhmur an run tum hian an run tur te hian an lo hre lawk a an lo tlan bo vek mai a, run tur an va hmu ta lo va, mihuanah te an lut a, fu te an fep hlawm a. Chawngbawla leh a thian chuan huan pakhatah ser thur deuh mai an ei lai chu pa pakhatin silai kengin pal hrulah a rawn veh a, dim deuh maia a lo kal tham tham chu a hmu hmasa ta hlauh mai a. Chawngbawla chuan a thianpa hnenah, “En teh, khuta mi khuan mi rawn veh a nih awm khu maw, i lo kap thlu hlauh zawk teh ang, nang tawkdarhah tang la, hmu awm lo takin langsar deuhah hian awm la, ka lo chang ang a, ka lo kap thlu ang e,” a ti a. A thianpa chuan chet hman loh palh awm theih hlauvin a ngam chiah lo va. Chawngbawla zawk chu tawktarhah a tang ta zawk a. Ral chuan fimkhur takin a rawn veh chho zel a, Chawngbawla chuan hmu awm lo takin a langsar laiah a ding a, ser kha a ei a, a dang lawh leh tur zawng ni awm takin ser buk chu a bih dak dak a, a chang leh a ler sang lam deuhte a en a, a han dak fan thin a; chutih lai chuan a thian chuan a vehtu khan silai a hmet per hmasa ang tih hlauvin hla tak atangin a kap a, a thelh leh nghal a; a vehtu kha a tlan bo ta a ni. hemi tum hian Chawngbawla chuan, “A pawi em mai i kap hma lua deuh a ni,” a ti mai a ni. Heta an ser ei hi ser thur em em mai, amah Chawngbawla ang maia thiante ang lo tak mai a thur danglam chung chuang zak mai a ni a. Chawngbawla chuan a mu chu a hawn a, huanah a ching a, chu ser chu tun thlengin Chawngbawla ser an ti ta a ni.
Chawngbawla hi sa lamah pawh a duai lo kan tih tawh kha. Zan khat chu zawlbukah hian nghalchang hliam hlauhawm zia leh inchhan hman a nih lohzia hi zawlbuk tlangvalho chuan tui fe hian an sawi a, chu chu Chawngbawla chuan a pawm hleithei ta tlat lo mai a. Vawikhat chu nghalchang hliam an beihnaah Chawngbawla chuan tawktarh atan naupang pakhat hi a hruai ta a. A hmun an thlen chuan nghalchang hliam hmuh ngei turah naupang chu a dintir a, chu veleh nghalchang hliam chuan a rawn bei a,’Vit’a han ti phei a, mi dang chuan silai mu ang maia rang niin an hria a. Chawngbawla chuan chemin nghalchang hliam hmui chu a lo chhawk hman reng mai a ni. Vawi khat chu a ram vahnaah Saipui no hruai a hmu a, a no chu man tumin a veh a veh a, a pui nena an inhlat lai nang chingin a man tak tak ta mai a. A sai no man leh a savawm ramtla lai bawp man chawiin a tu leh fate hming a sa a, a fapa chu Saizema a ti a; a tunu chu Saihlingi a ti a; a fapa pakhat chu Vawmthanga a ti a.
Chawngbawla hi a lo tar hnu chuan khawi mah a chhuak thei ta lo va, “Mihrang ka kual ta,” a ti a; a tupa pakhat chu Hrangkuala a sa a ni. Chawngbawlachu a lo tar chau ta a, “Khum laizawla thih hi ka lo tum ngai reng reng lo va, hei mahni khum laizawl ngeiah ka thi dawn a lo ni ta a, mak pawh ka ti a, khum laizawla ka han thi mai tur hi hreh pawh ka va hreh em!” a ti a ni. A thih hian kum 80 mi ni in an sawi.
Chawngbawla hian ral laka a huaisennaah hian a hming a chher bawk aniang naupang inkawihnawkte pawhin, “Ka Ka kawi Chawngbawla tlang ngai lo,” an ti kher thin a ni. Hetiang khawpa huaisen lama hming chher hi ni mahse huai lamah chauh ni lo chhiatni thatni ah pawh a mi tlawmngai a sawi a nih bawkah Sakhaw lam thuah pawh mi nun tluang tak ni a sawi a ni bawk.
Comments
Post a Comment