Nahaia thihder thu

Vawikhat chu Nahaia hian 'Mite hian eng angah nge min ngaih tehreng hriat ka duh e' a ti a, mi vantlang feh kawng hrulah muin a thider ta a. Mite an feh tur chu an kal zung zung a.

Chutia feh tur kal hote chuan, 'Helaia hi Nahaia a thi reng mai,' an ti a; a then chuan, 'A ni tak a!' an ti a, mahse tumahin an ngaihsak reng reng lo mai a, an kalliamsan zel mai a.

A hnuhnung berah chuan Chhura chu a lokal ve a, Nahaia chu a han hmu ve a, 'E hei! ka u a thi reng mai a, engtizia nge ni le?' a ti a, a tap ta chiam a.

Chutia Nahaia a thih tak avang chuan a hnathawh tum pawh chu a thulh a, a u chu in lamah a paw haw ta a.

In an thlen chuan Nahaia chu a lo ding ta thut a, Chhura hnenah chuan zawimuangin 'Tunah chuan ka hrechiang ta, ka unaupa Chhura ngei hi min hmangaihtu leh min duhsak tak taktu chu a lo ni e, ka mangan tak tak chuan ani hi ka tana inpumpek ngam leh a thim a var thlu lova min buaipuitu tur tak tak a lo ni e,' a ti ta a.

Chuta tang chuan Nahaia chuan a nau chu hmangaih leh duhsak takin a kawm chhunzawm ta a, a lakah chuan thil diklo leh suahsualna chi reng reng tih a duh tawh loh zia a takin a lantir ta a, tichuan an unau chuan inngeih takin an awm ta a ni.