Daktawr Chhura

Ni khat chu a nupui feh hlanin Chhura chuan in lamah an fa sen chu a lo awmpui a. Naute chu tuihal leh riltamin a tap a tap mai a, Chhura chuan a tap thlem ban dan a hre hlei thei lova.

A mal chungah a pawm a, a chang leh a paw thul, a thiam ang angin a awi a, a han kalpui dawrh dawrh thin a, mahse naute chu a tap reng tho mai si. A tawpah chuan Chhura chu a ngaih a tha thei ta lova, naute chuan engemaw na a nei aniang tih a ring tlat a.

Ngunthluk takin a taksa leh a lu lamte chu a han enchiang a, chutia an khawih vel naah chuan a lu-dip a khawih fuh palh ta a, a lo nem niak mai si a, Chhura chuan hre ngai hek lo le, 'Hei zet hi a nih hi, hetiang pan hnai la mek nei chung chuan engtinnge a tah loh reng ang ni? A nat tur zia mai chuh tiin a ngaihtuah a, a pan hnai chu kheichhuahsak ila a dam mai dawn anih hi tiin a ngaihtuah a.

Tichuan Chhura chuan naute chu a tap hlum mai ang tih hlauvin a panhnai chu kheisak a tum ta a. Chemte, Chaichette, Hreipuite a la khawm ta rup mai a, tichuan naute chu a pawm a, a ludip lai chu a kheisak ta mawlh mawlh mai a. A lu-dip atanga hawng chuan a thluak zawng zawng chu a kheichhuahsak ta vek a, ngaihtha takin hetia a pan hnai ka khei chhuahsak chuan a dam hmak tawh ang, tiin a ngaih a tha ta hle a.

Rinhlelh rual lohvin a duh ang ngei chuan chutia a ludip a kheisak hnuah chuan naute tap chu a bang ta daih a, thlamuang takin a muhil ta siai siai niin chhura chuan a ngai a.

Feh hawn hunah chuan a nupui a lo hawng a, khawiah nge naute i dah? Engtinnge vawiin lamah i lo enkawl? a ti a. Chhura chuan tifuh inti fahranin kan naute khan a lu-ah pan hnai a lo nei a, ka kheichhuahsak ta vek a. A muhil ta siai siai mai a, tunah chuan khumah sawn ka mut, a ti a.

Chuveleh a nupui chu hmanhmawh takin naute chinchang hre tur chuan khum lamah a kal ta thuai a, 'Karei maw... eng thil nge i lo tih tak pek ni?' tiin a auchhuak ta chul a, a pasal thil lo tihdan a han hmuh chuan lawmna tur reng reng a hre lova. Naute chu a han dek a, a lo thi vawt ngiai tawh a, lungchhe tak chungin engtinnge i lo tih a, hei a bengte pawh a vawt vek tawh alawm, a thi anih hi, puanin tuam la, mitthi pukah va dawh ve tawh a ti a.

An naute chu tuamin a puchhuak ta a. Kawng laka a kallai chuan a tuamna puan chu a lo thawl deuh ni tur a ni, naute chu a lo pit chhuak a, kawngsirah chuan a lo tla reng mai a, Chhura chuan a tuamna lawng chu mitthi dahna pukah chuan a va thawlh fel ve diam a, a tihtur hlenchhuak tha hlea inngaiin a lungawi hle a.

A lo hawn kawngah chuan a fa thlauh tak chu a rawn hmu phei a, chu naute chu raphrual nawk nawk chungin tunge maw hetia nausente kalsan mai mai le, a va han fimkhur lo tehreng em ve, hetia phumfellohva kawngsira dah mai mai tur a ni hlei nem. Kei chuan kan naute thi kha mitthi dahna pukah ka va dahfel diam tawh a ni ngai a, a thlauhtu chu mi tihtlak loh tak a ni tiin naute chu a raphrual zel a. Ama thlauh a ni tih reng reng a hre si lo. Chutia a hawn lai chuan tumlawkna pawh nei hauh lovin ama beng a han khawihfuh palh a, a lo vawt hle mai si a. Tichuan, 'E khai, keipawh ka beng a vawt tlat mai, ka thi anih dawn hi,' tiin ngaihtha lo takin, amah leh amah chu inphum turin mitthi dahna pukah chuan a kir leh ta a.

Chutia inngaihtuah buai lova mitthi zinga a va inphum ve tak avang chuan chu hmunah chuan nilengin thi tak taka inngaiin a va awm ve ta a.

Tlailam a lo ni a, lu a sun avanga lungleng pitar pakhat chu mitthi dahna lamah chuan a va leng a, a khawhar lutuk chuan khawhar hnemah tiin mitthi puka awm te u, vawiin lam in hun engtinnge in hman le, tiin a va au diai diai a.

Chu pitar chuan tuman an rawn chhan reng a ring lova. Mahse chutihlai tak chuan Chhura chuan aw hniam teng leh pawr takin kan duh ang angin hun chu kan hmang ve mai, a lo ti dut dut a.

Rin loh tak maia chutia chhanna a han hre ta thut mai chu pitar chuan mak a tiin a hlau ta em em mai a, a tlanchhe ta dawr dawr a, pitar hlau lutuk tlanchhia a han hriat chuan Chhura pawh chuan hlauh a nei ve ta thut a, ka pi min lo nghak rawh, tiin pitar chu a um ve ta chiam mai a.

Chutia Chhura'n a rawn um ve takah chuan chu pitar chuan a hlau lehzual a, chak mangkhengin a tlan a, Chhura chuan a umpha thei lo hial a ni. Chu pitar leh mitthi tho leh Chhura chu khua an thlen hma chu chak takin an tlan dun ta a ni.