Chhura mawngping khaw zin

Hmanlai hian tum khan chu Chhura hi mawngping khuaah a zin a, mawngping khua tih takah chuta chengte chu an mawng a ping vek a. Zing a lo nih chuan Chhura chu luhka thlang lamah a daileng a, a e ta zut zut a. Chutia a mawng atanga ek a lo chhuak ta zut zut mai chu an hmuhin mite chuan mak an ti a, 'Engtiziaa e thei nge a nih bik?' tih an zawt ta a.

Chhura chuan, 'Mi na chu le, kan nausen laiin kan nu leh paten tulthir lingin kan mawng an verh a, tihian kan duh duhin kan e thei ta mai alawm' a ti liam mai a.

Chutia Chhura anga e mai thei nih chu an duh ta vek mai a, 'Ka nau mawng min verh sak ve rawh,' an ti a, an fate chu an rawn lakhawm ta huai huai a. Tichuan tulthir lian deuh chu Chhura chuan a rawh ling ta a, an fate mawng chu a vih pawh sak ta zung zung mai a, papui chhungah chuan an khungkhawm ta ruih mai a. Tuk thum tukah chauh en tur a ni, a ti tlat a, tichuan nausen mawng a verh zawh hnuah chuan chu khua chu a chhuahsan ta a.

Mawngping khuaa mite chuan Chhura thusawi chu an sawm tha hle a, a tuk thum tukah chuan an zuk en a, nausen zawng zawng chu an lo thi deuh vek tawh a, pakhat te hi a lo la dam tek tek a, chu lah chu, 'Kei ka fa a ni,' an ti a, an inchuh a, an pawt hlum leh ta mai si a. Tichuan khuaa mite chu an thin a ur ta a. 'Chhura'n min tihder a ni, hawh u, i um ang u khai, i tihlum vek ang u,' an ti a, an um ta a.

Chhura chuan min um a ni tih a hria a, thing-tuluang lian tak kawrawng chhungah hian a lo biru a. A umtute chuan chu thingtuluang chu an va thleng a, an beidawng ta a, an thukhawm a; an zinga pakhat chuan, 'He thingtuluang hi Chhura ni sela chuan heti hian ka ti tur,' a ti a, a han khawh chat a.

Chupa tawngkam leh thiltih dan chu hriain Chhura chuan, 'Mi khawh fuh tak tak ange,' a lo ti ta a, tah chuan an hnukchhuak a, an man zui ta a. Chhura chuan, 'Anih loh leh, hman laiin pi leh pute ral man dan angin, ka kiuah hian han chelh tel tel rawh ule,' a ti a, a kiuvah chuan a dawmtir ta hlawm a. Tah chuan Chhura chu a han tal a, a vai ta vak a, an hmuiah te, an hnarah te a chum thi sak ta hlawm a, a tlanchhuak leh ta daih mai a ni.

Tichuan loh theih lohvin Chhura tlanchhia chu um a ngai leh ta a, a umtute chuan lehkhalh tumin kawng ni lo lamah an tlankhalh a, chutihlai chuan Chhura chu Hmawng kungah a lawn ta daih a. A umtute chuan Hmawng bulah chuan an nghak ta ran mai a. Rei tak an nghah hnuah chuan Chhura chu a chhuk duh si lova, chu thing chu kih mai an rel ta a.

An thingkih tur chu a tlu lek lek tawh tihah Chhura chuan thingler atang chuan a zuk au va, 'Ekhai, in va hah tawh awm ve, min lo nghak lawk rawh u, ka lo chhuk anga ka rawn kihpui ang che u,' a ti a. Tichuan Chhura lo chhuk thleng chuan an nghak a, mahse thing chu a tluk ruai ruai laiin Chhura chu a tlanchhuak leh ta a.

Amah umtute chaun man lova chhuah chu an duh bik si lo, theihtawp chhuahin an um leh ta a, a tawp a tawpah chuan an man leh thei hram a. A kut hnung an khirh sak a, Papui chhungah an khung a, tuipui chung leihlawnah an khai ta vu vu mai a.

Tunah zet chuan Chhura chuan chhuah ruk ngaihna a hre ta lo. Chu papui chhungah chuan zawimuangin a thi mai dawn niah a ngai tawh a. Amaherawhchu vanneihthlak tak maiin ni khat chu pawihte pakhat thil phur hian chu leihlawn chu a rawn zawh a, Chhura chuan a hlauhawm thei ang berin, 'Pawiha min rawn chhuah vat rawh, min rawn chhuah loh chuan ka chemte hian ka that ngei ngeia ng che' a ti a, a chemte bung chu a hmuh zoh zoh a. Chu pawihte zin veivak chuan a hlau hle mai a. Chhura chu a rawn pan hnai a, Papui chhung atang chuan a chhanchhuak ta a. Chuveleh chuan Chhura chuan, 'Pawiha, han lut ve chhin mah teh, a nuam tak tak a ni,' tiin a thlem a.

Chu pawihte chu thil han tihchhin chak mi tak a lo ni a. Chhura awmna Papui chhungah chuan a lut ve ta a, Tichuan chhura chuan leilawn hnuaiah chuana khai ve leh ta thut mai a. Chhura chu a harhchhuak thut mai a. Pawihte an khaina hrui chu a sat chat ta a, tichuan, chu Pawih zin veivak mi chu a hnuaiah luipui luang so but butah chuana tla hlum ta a ni.

A vanneih asiamin chu pawihte chuan rohlu tak tak a lp hur teuh mai chu niin. Chhura chuan chung zawrhsum thil chi hrang hrang chu a phur a, mawngping khaw lamah chuan a kirchho leh ta a.

Khua a han thlen chuan mawngping khaw mipuite chuan mak an lo ti hle a, Papui atang chuang engtin tak lo chhuak leh ta chu ni maw, an ti rilru a. Tin, chumi rual chuan an thil phurh hlu tak takte chu khawia mi nge ni ang aw an ti bawk a.

Chhura chuan min kalsan hnu khan ka kawngah hian Bel ka taivawn a, lui tuiah chuan ka zuangthla ta a. Lui mawngah chuan rohlu tak tak a lo awm teuh mai chu niin, chung chu ka duh zat zat ka la chhuak ta a, ka rawn phur hawng ta a nih hi. Hausak in duh chuan lui mawngah chuan zuk lut ve mai rawh u, a ti a.

Khuaa pa valai chin zawgn chu rosum phurh tumin an chhuak ta chum chum mai a. Chhura thu awih chuan lui mawng lam chu an pan a, tuiah chuan an tlahlum ta phiar mai a. An pasalte an lo haw tak lovah chuan nuho chu an mangang ta hle mai a, Chhura chuan lui mawngah khan rohlu tak tak a tam em mai a, an phur rit lutuk a ni ang, chhawk turin kal thuai rawh u, a ti a.

Chutia a tih veleh chuan nuho chu an pasalte chhawk turin an liam ta sung sung mai a. Khua an chhuahsan fel ta maw tihah chuan Chhura chuan an mei zawng zawng chu a leih mih sak ta vek a.

Thim hlimah chuan an pasalte chanin nuho chu lungchhe takin an lo hawng a, an ril a tam a, an tui a hal bawk a. Chaw an han chhum dawn a, an mei chu a lo mit vek mai a, tu inah mah chuan mei an chhem thei ta lova ni. Chhura chu mei an dil a, a ni chuan thil chi hrang hrang phutin mei chu a lo pe ta zel a.

Chutichuan chu khuaah chuan Chhura chu a lo hausa ta hle mai a. Hmeithai ho zinga mi chu a duh duh nupuiah a nei a, an fanu hmeltha thate chu a nei bawk a. Mawngpin gkhuaah chuan lal ropui tak a ni chhunzawm ta a ni.