Chhura leh Nahaia'n In an inthleng

Chhura leh Nahaia hian khaw pakhatah in an sa ve ve a, veng khatah an cheng nghe nghe a. Chhura In chu a rinawm tha hle a, Na-a in erawh a tlabal hle thung a ni.

Nahaia chuan a inchung kaw siar suar hnuaia khawsak reng mai chu ruahsur nikhuain a hrehawm tih a hria a. Chhura hnenah chuan in inthlengpuiah a va sawm a. Mahse Chhura chuan, Khai nang zawng i inchung te, i bangte a kaw nasa siar suar em mai, a lo ti a.

Nahaia chuan dang hauh lovin chung kaw siar suar te chu ka duh reng vanga ka siam alawm, zanah mu chungin arsi mawi tak takte khi ka thlir reng thin asin, a ti a. Chutia a tih takah chuan Chhura chuan mu chunga Arsi thlir chu a chak ve ta tlat mai a. Ruah lo sur hunah eng angin nge a mangan dawn tih lam reng reng a ngaihtuah chang lo.

Tichuan, Chhura leh Naa chuan In chu an inthleng ta a. A zan hmasa berah chuan Chhum a tam deuh avangin Chhura chuan Arsi te chu a hmu thei lova, a zan lehah pawh chuan van lam chu a thiang chuang lo.

Ruah a lo sur tak hnuah phei chuan Chhura tan chuan mut ngaihna reng reng a awm lova, chutihlai chuan Nahaia erawh chu thlamuang takin a mu sek sek a ni.

Eng dang sawi lovin Chhura chuan a in chung pawpte chu a thawm char char a. Arsi thlirna tur atana a lo ngaih inchung leh bang vel kuate chu a phui thei ang bera thawm a lo ngai leh ta a. Mu chung chuan Arsei chu a thlir leh ngai ta reng reng lo a ni.