Chhura kawng bo thu

Chhura leh a chhungte chu retheih namenin an rethei lova. An lo atanga an tharchhuah zawng zawngte an ei zo tawh a. Buh thar leh tur an pawngpaw nghah ngawt tawh mai a. Engtia tih tur nge ni ang tiin nasa takin an inngaihtuah a.

An ina an ro hlu tak, hluma siam Belpui, an chhuan em em chu hralh loh theih a ni ta lova. Ui em em chungin ei tur dang an neih tawh si loh avangin hralh zai an rel ta a ni.

A tuk zingah chuan Chhura chu an khaw bul hnai ber, ni khat kal vel tura hlaah a Belpui hlu tak zuar tur chuan a thawkchhuak ta a.

An in a chhuahsan hma chuan a nupui chuan Bel a tihkeh mai chu hlauvin leia nghat miah lo turin a hrilh a. A nupui thuchah chu vawng rengin Chhura chuan a koki a kham hle hnuah pawh a koki lehlama put nachang a hre lova.

Zing takah a thawkchhuak a, a Belpui chu a koki dinglamah a pu a, ni a lo tlangsan chuan a rit a ti hle tawh a, mahse a nupuiin a tihkeh a hlauh em avangin kawng dungah chuan chawlh pawh chawl ngam lovin a kal ngar ngar a, a Bel pawh chu leiah a nghat miah lo a ni.

Tichuan, hah hle mah sela chawl hauh lovin a kal zel a. A kalna tur kawng chanve vel a kal tawh tihah chuan a koki a kham tawngkhawng tawh a, a koki veilama put ve thung a duh hle a.

A nupuiin a Belpui put lai chu leia nghat reng reng lo tura a hrilh thu kha a hre reng a. Engtinnge leia nghat lovain a koki lehlamah a put theih ang tih chu nasa takin a ngaihtuah a. A rilru pawh a inhnial nasa hle a ni.

Hun engemawchen a inngaihtuah hnuah chuan a koki thlak a duh tawh si a, amah chu a inher vut a. Takai le, ka Belpui chu ka koki lehlamah a awm der a sin, tiin lungawi takin a kal ta zel a.

A kalna kawngah chuan anmahni khaw lam panin a kir leh a ni tih reng reng a hre lova, tichuan tlai tluanin a kal zel a, nia a thla lang pawh chu a tungsei hle tawh a ni.

Nitlai dawn ruaiah chuan anmahni khua ngei chu a thleng leh ta a. Amaherawhchu zinga a chhuahsan laia a pan lam khua thleng ta-ah a inngai tho thova. Khuaah chuan a faten an lo hmu a, ka pa, ka pa, tiin an lo ko lawm lawm a, i lo haw leh ta chu kan va lawm tak em, an lo ti a.

Mahse, Chhura chuan a rilruin heng naupang te te te chu an va fel tak em aw, ka pa, ka pa, tiin min lo ko mai a. Nilenga ka zin hnuah pawh khawthenawm nuam tak thleng ang mai ka nih hi le a ti a.

Ama fate ngeiin an lo lawm a ni tih erawh chu a hre reng reng lo. Anmahni thenawm chiah inah chuan innghat turin a lut ta hlawl mai a. A fate chuan an nu hnenah ka pa chuan kan thenawmah sawn hralh turin a zuar, an ti a.

An nu chuan, 'Va kal ula, lo haw turin va hrilh rawh u, a ti mai a. Naupangte chu an va kal a, Chhura chuan a lo ngaihsak hauh lo mai a. Chumi hnuah chuan a nupui ngei chuan a va ko ve leh ta thung a. Chhura chuan muang raih hian Aw, i pasal ka ni emaw i ti a ni maw, ni lo kei chuan kan khuaah nupui ka nei alawm. Midang nei thei ka ni tawh hlei nem, a ti a.

Chhura chu chutiang taka a nupui tana mi rinawm leh a tih tawh lama mi nghet a ni.